Nā: Te Kawa Robb
Naenae College
Rangatahi
E mahi tahi ana a Track Zero me te Taurima Toi o Aotearoa ki te āta tuku i ā rātou mahinga toi...
E mahi tahi ana a Track Zero me te Taurima Toi o Aotearoa ki te āta tuku i ā rātou mahinga toi. Ko Track Zero he hunga toi e ngākau nui ana ki toi me te taiao me ngā kōrero mō te āhuarangi (climate) me ōna tini āhuatanga katoa, ā, e whai ana rātou kia tōia mai te hunga taiohi ki runga ki tēnei waka, te waka whakarauora i te taiao.
Neke atu i te kotahi wiki tēnei hunga rangatahi e mahi ana me Track Zero, i wānanga tahi hoki rātou me ngā tohunga pūtaiao pēnei i a Tim Naish rāua ko Tākuta Daniel Hikuroa. Mutu ana te wānanga pūtaiao, ka huri ki te wānanga me ngā tohunga tango whakaahua. A Te Kawa Robb, a Chevron Hassett, rātou ko Te Rāwhitiroa Bosch.
Ko tēnei whakaaturanga toi, he mea whakakōrero i ngā whakaaro o te hunga rangatahi ki te huringa āhuarangi me ōna tini āhuatanga katoa.
E mihi nui ana ki te kura mō rātou i āta manaaki i te kaupapa nei. Me mihi ka tika anō hoki ki te hunga rangatahi, nā rātou tēnei kaupapa i pīkau.
Photographers
Te Kawa Robb
Te werowero – The challenge
Nō tā mātou haerenga me te kāreti o Naenae i tūmeke katoa mātou i te nui o te para mētara. E kōrero ana a Annie rāua Iona e pā ana ki tērā mate, te nui o te para kino e horapa ana i te whenua. Otirā ka kōrero hoki rāua mō ngā mahi me mahi e tātou, e ora ai te taiao, e ora ai te tangata.
E tipu e rea – Grow up tender young shoot
He mea nui te tiaki i te taiao. Heoi anō, inamata tonu nei, kei a tātou kē ngā rauemi, kei ō tātou ringaringa. Te kākano o te mātauranga me tōna hoa haere me Pūkenga maha, koina ngā rauemi hei hāpai i te hunga rangatahi e pihi ake nei, e rerekē ai ō rātou whakaaro i tēnā o te reanga o runga ake. Mō te Māori, nō mai rā anō tēnei mahi, te tiaki i te taiao, me te tino kounga, koi, matatau o ngā tīpuna ki te pērā, kāore i tua atu.
Te Tūmanako – Hope
Nō mātou ka noho ki ngā tauira o Te Kura Māori o Ngā Mokopuna, i mōhio pū mātou, ahakoa te nui o ngā pāranga kino ki te whenua a mohoa nei, he anamata ātaahua te haere mai na. I kōrero rātou mō ō rātou wawata mō ā rātou uri whakaheke. I hangaia e Hemaima-te-wai tētehi whakaahua e whakaatu ana i ngā momo ō nehe, ngā mātauranga tiaki taiao ō mua, ā ngā mātua.
He kai kei aku ringa – The food in my hands
He whakaahua takitahi, e kohi mātaitai ana ki tātahi ki Motukairangi. Ko te kohi tika i te kai tētehi mahinga nui e tiaki pai ai te taiao. Ko ēnei anō hoki ētehi mahi e hono ai te tangata ki te taiao, otirā ki tōna māoritanga. Kāore ēnei hononga e rangona, e kitea rānei ki ngā hokomaha.
Chevron Hassett
Roimata Waitai (Takirua)
‘He wai tai kei aku roimata, he wai moana kei aku toto’
Dr Teresia Teaiwa
He hononga nui tō ngā iwi taketake ki te taiao, otirā ki te whānau. He pānga nui anō hoki tō ngā rohe whānui ki tō tātou tuakiri, me tō tātou oranga tonutanga. Ehara tātou i te hunga patu i te taiao, erangi ko tātou te hunga ka rongo tuatahi ki ngā whakawhiu o te huringa āhuarangi.
